Manifèste pèr la Diverseta Naturalo-e-Culturalo – Biocultural Diversity Manifesto

Se n’en cresèn lou raport dei Nacien Unido sus la diverseta naturalo, un milien d’espèci de la boulo dóu mounde saran avalido dins lou debana deis annado que vènon. Tambèn, sabèn segur que de demasia la diverseta naturalo, acò magagno au còup la diverseta dei lengo e dei culturo, coumo v’afourtisse puei l’UNESCO. A l’ouro d’aro, de tres part uno dei lengo dóu mounde si capiton parlado pèr mens de milo gènt e si pòu tabla que la mai grosso part d’aquélei lengo vai cabussa dins lou centenau d’an que vèn. Uno culturo es escassamen marcado dins un endré pèr lei liame entre un pople e soun envirouno. D’acò s’endevènon de valour, de counouissènci e d’usanço despariero ligado ‘mé la diverseta naturalo (diferèntei formo de vido que li coumtan lei gène, leis espèci e leis ecousistèmo). Tambèn, pèr parla de la sauvo-gàrdi de la diverseta dei formo de vido, emplegan un voucabulàri coungreia pèr l’envirouno culturalo.

Em’aquéu manifèste, voulèn acertana que diverseta naturalo e diverseta culturalo soun estrechamen embessounado. Segound de recerco recènto, la diverseta naturalo-e-culturalo demenisse bravamen de pertout, emai d’estat — e mai que d’un — agon estigança de lèi e de plan pèr apara la diverseta naturalo d’encuei. Nautre, que si signan aqui souto, counsideran que basto pas d’agi sus d’aquel item. Afourtissèn que lou tèms quicho tambèn pèr agi contro la perdo de la diverseta dei lengo e dei culturo dins lou mume anamen.

Dins aquéu manifèste aqui souto, assajan de faire vèire coumo establi soulide aquélei liame. E coumo enança de biais d’ajuda vertadieramen la sauvo-gàrdi de l’entremai dei coumunauta que nous envòuton. Ansin poudran fa tira longo mai dins un mounde fa de mant un mounde. E dins aquelo estiganço, duvèn regarda en fàci lei liame founs que li a, dins la perdo de la diversita naturalo-e-culturalo, entre lou debana dins d’endré particulié e dins lou toutun dóu mounde.

Se lou poun de visto que avèn sus la sauvo-gàrdi de la diverseta naturalo e dei ressourço s’apren ei biais de faire em’ei sistèmo de counouissènci que si lei passan gramaci lei lengo e lei culturo, que siegue pèr lou bèn o pèr lou mau, nous faudra puei trasfourma nouàstei biai de faire. Sara necite de faire crèisse un lengàgi nòu pèr encapa de viéure loungamen e ensemblamen.

Ecounoumìo e envirounamen

Leis uman e la naturo soun religa tau coumo leis uman va soun entre élei dins lou mounde. Es mai-que-mai impourtant de coumprene lei liame entre naturo e soucieta pèr s’asata ei chanjamen dóu mounde e pèr gaubeja soun garimen. Lou sistèmo ecounoumique d’aro pipo lei ressourço dóu mounde sènso si demanda se saran acabado un jou. Lei counsequènci d’aquelo desplecho s’amoulounon e magagnon la diverseta naturalo-e-culturalo. Aquéu sistèmo nous empacho jusco de si regarda coumo uno espèci que fai partido de l’ecousistèmo.

Lei gouvèr, leis ourganisacien publico e privado, e la soucieta entiero, duvon leissa vèire à bèus uei ce que fan, n’en rèndre de comte, emai si vira vers de visto novo e de plan pèr avança. Es necite que tènon comte de ce que lei ressourço naturalo represènton de-bouon e significon dins lei dire de diferèntei culturo. Dins aquelo amiro preciso, poudrian :

Crea uno endico de garantido pèr uno prouducien que respèto la diverseta culturalo e naturalo (pèr eisèmple coumpara, d’un las, lei terro dei gènt de l’endré e lei terro preservado emé, d’un autre las, lei terro messo en grando culturo d’uno souleto cauvo ; o tambèn la diverseta culturalo dei gènt qu’obron dins lei coumpagnié.
Crea de draio bèn marcado pèr leis ourganisacien en bousco d’aquelo endico de garantido après agué mena d’acien councrèto de sauvo-gàrdi de la diverseta naturalo e culturalo.
Bouta pèr escri uno definicien largo de la diverseta culturalo e chausi uno escalo pèr la caneja (coumo pèr eisèmple Entropy, Shannon Index, Simpson Index, Berger-Parker, etc.).
Empura de recerco sus de nouvèu partàgi dóu coust de la sauvo-gàrdi naturalo-e-culturalo de tras lei pres de vèndo finau dei besougno de touto merço (culturo, manjaio, etc.).
Enança de pouletico de sauvo-gàrdi dei diferènt poun de visto culturau, pèr fin que, dintre lei partido interessado ei discutido pèr uno ecounoumìo que lou mounde pouasque sudura, deguno culturo e degun ecousistèmo siegon leissa de caire.
Buta d’ourganisacien publico vo privado pèr que souscrivon ei miro de trachimen sudurable dei Nacien-Unido, que a de liame emé la diverseta naturalo-e-culturalo.
Estudia se tendrié soulide de tarifa dedins lei ciber-mounedo sei counsequènci, sa part, soun gouvèr, raport au biousistèmo.
Douna d’ample e d’ajudo à la descricien e à l’analiso de nouvèuta de pertout dins lou mounde raport à la diverseta naturalo-e-culturalo pèr fin de lei tourna faire dins d’àutreis endré.
Si rescountra e si parla de-bouon dins de relarg bèn defini.

Educacien e counsciènci

Dins nouàstei soucieta, quicho lou besoun d’empura la coumprenènci, la counsciènci emai l’analiso de l’embessounàgi entre lengo, culturo, e diverseta. Dins aquelo amiro, l’educacien es la clau pèr faire liame entre lei generacien. Si déurié pas ourganisa e viéure l’educacien coumo quoucarrèn que davalo d’adaut (d’aquélei « que sabon » vers aquélei que « cercon de saupre »). Tant sarié miés de la vèire coumo un escàmbi à egalita de pratico e de sabé, tè tu tè iéu, sènso faire de diferènci entre lei gènt e sa plaço dins la soucieta. Talo coumo si la pensan, l’educacien si capito un mejan de parteja de pratico e de sabé en si dounant la man emai en respetant lei diferènci d’envirounamen. Em’acò en visto, avèn lou devé d’aumenta la counsciènci de la diverseta dóumaci l’educacien, que duvèn bèn encapa la diverseta coumo uno cauvo proufichouso pèr l’educacien de cado persouno.

Nous fau tambèn religa l’educacien à l’idèio de « faire passa », subretout faire passa de pratico e de sabé desparié qu’avèn ja dins de groupe culturau e souciau diferènt, que li caupon tambèn li gènt terrenau… E pas escassamen d’asciença, d’ensignaire o de gènt recounouissu coumo saberu pèr de diplomo e de diplouma. Valènt-à-dire que de faire crèisse uno counsciènci de la diverseta de la naturo, dei culturo e dei lengo, acò demando mant uno gènt coucernido. Vaqui, sus de foundamento balançado, lei principàlei noucien que lei duvèn trata depèr uno educacien à la diverseta naturalo-e-culturalo :

La diverseta, que siegue naturalo, culturalo o lenguistico, dèu èstre ei prougramo d’estùdi de tau biais de n’en sauvo-garda l’entremai em’uno mescladisso d’antroupoulougìo, d’art de travaia la terro, d’ecoulougìo, d’estùdi de l’envirounamen e de sciènco soucialo.
La clau de tout es, raport au lou soustèn de la diverseta naturalo-e-culturalo, de s’adreissa ei pichoun, ei jouèine tant coumo ei pas tant jouèine, à touto meno de colo de gènt, emé de gàubi d’ensignamen asata au mounde em’ei besoun de cado poupulacien.
Dins aquelo amiro, lou tèms quicho pèr desviroula de prougramo nòu e d’endraiado educativo novo, amagestra en si dounant la man, dóumaci uno grando varieta de biais, d’eisino, de poun de visto e de countengut.
Fau empura de biais nouvèu vo óuriginau d’ensigna : d’eisino mouderno que degaion pas la naturo, de jue, d’ataié, de vesito reciproco, de pratico dins la vido vidanto… Ato puei lei fau emplega sènso si desvira de la bouano rego en si groupant sus lei questien d’envirounamen.
Leis endré dedica à l’aprendissàgi, lei fourrié estigança dins lou respèt de la diverseta naturalo-e-culturalo dóu relarg e dins lou respèt de besoun que si pouascon sudura. L’aprendissàgi, tant fourrié peréu que si faguèsse fouaro l’escolo, pèr fin que si rescountrèsse de diverseta naturalo-e-culturalo dins d’envirouno cafido de cauvo que lei fau aprene, sauvo-garda, apara, assousta e faire crèisse.
Es necite de counvida de gènt councerni que vengon de fouaro l’escolo, dins l’estiganço que pouarton sa pèiro à l’educacien em’à la preso de counsciènci à parti de la filousoufìo e de l’envirouno que soun lei siéuno.
Bord que de faire vèire lei cauvo es quoucarrèn de fouaço impourtant pèr empura e faire passa d’idèio sus la diverseta naturalo-e-culturalo, si capito necite de sousteni d’envencien artistico o scientifico que s’apiejon sus de teinoulougìo interativo.
L’educacien es aqui pèr encouraja, entreteni e espandi uno idèio pousitivo de la diverseta, que fau s’engaja pèr la sauvo-garda e la sousteni.
L’educacien es aqui tambèn pèr ensigna coumo parteja l’engajamen e lou sougna entre tóuti lei gènt, coumo encapa l’entremai foundamentau de la diverseta e coumo, puei, coumprene lei representacien e lei vesien dóu mounde que barrulon dins lei soucieta.
Pèr bèn faire lou balans entre l’educacien eis escolo e la trasmessien dintre lei famiho, fai mestié tambèn de de si demanda founsamen dequé es la significacien dei cauvo, gramaci l’estùdi dei bescomte, deis arquetipe, dei simbèu, dei prejuja, dei representacien.
Li a un autro cauvo fouaço impourtanto, es l’estùdi e l’espandimen dei noucien d’« assèti mouvedis » e d’« oumeoustàsi » (auto-mantenènço), pèr fin de coumprene e de si bèn figura lou liame entre lei soucieta umano e seis envirouno.